Denkst Are Gebt An Editor

De ledsht wock we du ken tzeidung ga-drucked husht bin ich ins shtettle, un far de tzeit tsu bringa bis de Hawsa Barrick train fart is bin ich in di office ni g'shtepped. Es wore nemond dahame un de leit hen mir g'sawd du warsht drows hawsa sheesa. Ich hob mich grawd dahame g'mauched, hob en weidamoyer segar aw-g'shtecked, my fees uff der dish, un moll awfonga di brief laesa. Der arsht brief wore fum a bolitician. Dare hut dir g'sawed we en bolidix tzeidung brooka. "Mauch se rode hase. Geb da Demagrawda h--l. Se sin nix bessers ga-waint," hut are g'sawgt. Der naixt brief wore fum ma mon os ols Huffman's drubba ga-peddled hut un we are ken laeve mae maucha hut kenna on sellum is are ons breddicha. Dare mon hut g'sawgt: "Di tzeidung is tsu gud lose far my kinner laesa. Shtup se." Ich hob go-gooked un are wore much dri yohr tzurich uff si subscription. En onerer brief hut g'sawd du warsht en farflompts kolb wile due net si ardickle in de tzeidung ga-do hedsht woo are g'shriva hut far si nuchber ba-usa. En onerer brief hut g'sawd: "We will draw on you in ten days if this bill is not paid." Ich denk du musht ebber shooldich sie. Ae brief hut g'sawd di tzeidung ware net feel wardt except far lod-warrick hoffa tsu binna. Es laesa ware gor nix wardt awver are daid denka du daidst olles ni os du wisht un mir kent dich net blama far wos du net wisht. Un so hav ich fart ga-laesa--ich wore usht recht in der bisness we de deer uff gonga is un en oldter mon is ni g'shtepped mit ma glaena boo on der hond.

"Gooter-morga," hut are g'sawd. "Bisht du der Kernel Harder?"

"Yaw," hov ich g'sawd.

"Well, ich bin usht ri comma mit mime boo. My familia is om tsu nemma un ich muss dale fun ena lose wara. Der Mose un der Mike sin shlipperiche karls, der Pete is om inventa, awver wos are mauched con ich net saena. Der Bill hut sich de naws ferbrucha onera shootin-match.Der Joe shtuddied medicine un board da-hame, der Abe un der Sam sin g'hired un runna my boweri far sich selver, un de onera cooma goot aw except dare glae eoxy, der Jim, un ich hob gamained ich wet an editor ous emem maucha. Are is tsu armlich un tsu fowl for shoffa un are doot nix os fressa, un wile anich ebber en tzeidung runna con os en dimeling foll harn hut hov ich usht gadenked de drucker de drucker bisness daid ene soota. Wos denkst du derfun?"

"Yaw," hov ich g'sawd, "luss ene doh. Mir broveera un usa ene in der office. Mir kenna es fet ous emem borda far de press schemara un's flaish kenne mir da hinkel feeder. Se sawga flaish daid de hinkel gor woonerbawr laega maucha, un der oyer----"

Awver der oldt karl hut net g'wart far mae hara awver hut si boo g'numma un is tsu der deer nows so hardt os are gae hut kenna. We are drows were hov ich ene hara en mon froga sidder won os "der Kernel Harder ous sime kup ware?

Ich bin nuch awhile hucka blivva bis en karl ni cooma is un der ruck ob-galaiged, de hem armel nuff ga-wickled un het si finger uff en ardickle in der tzeidung un het mich g'frogt eb ich der editor ware un eb ich sell shtick g'schrivva het? Ich hob grawd g'saena os are bisness mained, un wile ich's editor bisniss anyhow laedich wore hov ich g'sawd:

"Nae, nae! Ich bin net der editor. yader ebber wase os ich usht der Gottleib Boonastiel bin, un won der leeb Gud mich essa-mohl lavendich ous dem luch lust don will ich in mime laeva nimmy im Kernel Harder si shoe shridda!"

Are hut mich nows ga-lust un derno hut are der hoch shtool g'numma un hut g'sawd are wet de tzeidung runna bis are dich aw-dreffa daid. Won de tzeidung rous coomed de woch mit ma bloa awk don wase ich os are dich aw-gadruffa hut.