In Ma Hexa Nesht

De onner nocht hov ich en ride g'hot os ich awver in meim laiva net fargess. Ich wore nunner noch em Eila Shettle uff awennich bolitix bisniss un hob mich farsimed. Ich hob ols naixt dart g'wooned un hob de leit ols goot gakent. De leit hen mich aw gakent un sell is del shult os ich fart gatzooga bin. Ae mon in batickler hov ich ols gaglicha--es wore der Mike Belsinger, unser black-shmit. Are hut meim gowl en monich eisa uff g'shloga un olla mohl os ich nuch der shmidt bin sin mer boomerawlish foll warra mit nonner. Well, den mon hov ich widder awgadruffa om oldta blotz uns naixt os ich g'wist hob hut are mich in sime keller g'hot om sider drinka. Ich hob der Polly farsprucha g'hot sober hame comma, awver fum keller sin mir ins wartzhouse un we ich nie cooma bin don hov ich olles fargessa waega bolidix un der Polly. Em wardt si fraw wore en oldt madel fun mina os ich ols ga-karraseered hob eb ich g'hired wore u mir sin gli gor woonerbawr confidential warra. Der wardt hut galocht un "yaw" g'sawd tsu olles, un es arsht os ich g'wist hob hov ich nix g'wist. De soon wore shunt unner un dreeva wolka sin uff g'shtiga gaega owet. Ich hob g'saena os en gwidder raiga uff commed un ich bin nows un uff em oldta Sammy Sensawetzer si oldte shimmel marr gagroddled woo ich g'lained hob g'hot. Ich hob mich net recht balanca kenna es arsht awver twza mon hen mich druff g'hova un der onna hut der marr anes ivver de shoonka ni g'hocked mit ma glob-board, un woopsh, is es obgonga, naiva on da fensa shtawka nows os der shmoke g'floga is. Ich hob tzae mile hame g'hot un dorrich en doonkler, weeshter wake. Ich bin om blotz farby woo amohl en Yudda peddler dote g'mauched is warra. Ich hob de idea gore net gaglicha awver ich hob en karicha leedle gapiffa far my shpunk uff holda. Es naixt bin ich om blotz farby woo der Bill Michelroyer sich g'henked hut. Es wore en wiser shtae im fens-eck g'laega un ich hob amohl en notion g'hot room draya un net farby gae. My hore hen my hoot so uff g'shova os are mir nimmy uff em kup gablivva is un ich hob ene in de hond g'numma. Gli huts awfonga dunnera un ei-shloga. Yaw, es wore so doonkel os in my ma sock un olla mohl os es gawedderlaiched hut huv ich g'maned ich daid en gonse lot geisht saena. Uff ae mohl bin ich um en eck room cooma in en doonkler bush. In der mit fun dem hov ich en grose fire g'saena. Now, en soberer mon ware gor net naixt, awver ich hob shpunk f'fossed un bin der-gaega garidda. Gli hov ich g'saena os leit um's fire room donsa. Des wedderlaeache hut mich so farblendt os ich net saena hob kenna wos un ware es is. Endlich hov ich g'saena os es oll weibsleit sin un de wora holver nockich. Ich bin, of course, grawd onna garidda so we evva en g'hireder mon daid. Es wore en hecka-push grawd far mir un se hen mich net saena kenna. In ame eck wore ebber g'hucked un de gike g'shpeeled. Ich hob g'saena os are harner uff em kup hut, glowa on da feese, un en longer schwontz mitera govvel draw. Uff ma dish in der mit g'henked is warra, en blootich messer un en lawd. Wos oll des maned hov ich net wissa kenna. Uff ae mohl draid anes fun da weipsleit room un ich hob g'saena os es de oldt Sis Shleggel is woo se g'henked hen far leit ferhexa. Es wore so farhoftich en hexa donse un der divel hut gagiked!

Bong? Well my hore hen nows g'shtonna os we keshta-eegla, my tzae hen uf annonner gaglebbert un my hartz hut gaboomt os ich bong wore se daida es haera. Ich hob de marr om tziggel greeked far room draya. De minutt os se sich farraged hut don, woopsh! wor's licht ous. Derno hedscht's awver haera sulla dunnera! Dowsend milune glebber masheena! Se sin ous em doonkla cooma os we eema ous ma koshta. De oldt marr hut sich ni g'lust far era beshtes. Oh, doo leever tsu-shtond! Het ich ust uff de Polly g'harriched! De hexa sin ols naixer un naixter uff cooma. Ich hob der marr tsu g'shprucha, for ich hob g'wist os mir boll onera brick sin un os hexa net ivver wasser gaena. Endlich hov ich's wasser g'saena un de naixt minnutt hen de blonka unich der marr era feese gaglebbered. Ich wore nuch lavendich, Gud si donk, awver my hore wora mir oll fum kup g'senked un ich hob nuch shweffel garucha far a pawr dawg.

Es brauch mir nemond nix mae ous-redda waega hexa, un wile ich anyhow en hexa ducter bin mawksht du des drooka far de benefit fun der cause. Du mawksht nuch unna draw shtata os my terms sin "Finf dawler de hex. Payment in advance. Satisfaction guaranteed or money refunded." Of course, du farshtaesht de "refunding" bisniss.